சி.எஸ்.கே.வில் இணையும் ‛சின்ன தல’: ரசிகர்கள் உற்சாகம்

சென்னை, மார்ச் 24-

‛தல’ டோனி தலைமையிலான சென்னை சூப்பர் கிங்ஸ் அணியின் பயிற்சி களம் மாற்றம் செய்யப்பட்டுள்ள நிலையில் ‛சின்ன தல’ சுரேஷ் ரெய்னா  அணியில் இணைவது பற்றிய முக்கிய தகவல் வெளியாகியுள்ளது.

சி.எஸ்.கே. பயிற்சி

2021ம் ஆண்டுக்கான ஐ.பி.எல். கிரிக்கெட் போட்டி அடுத்த மாதம் (ஏப்ரல்) 6-ந் தேதி தொடங்கி, மே மாதம் 30-ந் தேதி வரை நடக்கிறது. ஐ.பி.எல். அணி வீரர்கள் பயிற்சியை தொடங்கி உள்ளனர். ‛தல’ டோனி தலைமையிலான சென்னை சூப்பர் கிங்ஸ் (சி.எஸ்.கே.,) அணி வீரர்கள் கடந்த 10ம் தேதி சென்னையில் பயிற்சியை தொடங்கினர்.

இந்நிலையில் திடீரென்று சென்னை அணியின் பயிற்சி களமானது மும்பைக்கு மாற்றம் செய்யப்பட்டுள்ளது. மார்ச் 26 முதல் சென்னை வீரர்கள் மும்பையில் பயிற்சி மேற்கொள்ள உள்ளனர்.

‛சின்னதல’ இணைவது எப்போது

இந்நிலையில் கடந்த ஆண்டு ஐக்கிய அரபு எமிரேட்சில் நடந்த ஐ.பி.எல். போட்டியில் விளையாடாமல் ‛சின்னதல’ சுரேஷ் ரெய்னா நாடு திரும்பினார். இதற்கு காரணமாக முதலில் தனிப்பட்ட பிரச்சனைகளுக்காக ரெய்னா ஒதுங்கியதாக கூறப்பட்டது. அதன்பின் அறை ஒதுக்கீடு தொடர்பான பிரச்னையில் அவர் விளையாட மறுத்து விலகியதாக தகவல்கள் வெளியாகின. இதனால் நடப்பு ஐ.பி.எல்., தொடரில் ரெய்னா சி.எஸ்.கே.வில் விளையாடுவாரா, எப்போது அணியில் இணைவார் என்று ரசிகர்கள் மனதில் கேள்விகள் உதித்தன.

இதற்கு விடை கிடைத்துள்ளது. ரெய்னா குறித்த அதிகாரப்பூர்வ தகவல் வெளியாகியுள்ளது. அதன்படி மார்ச் 26-ந் தேதி சென்னை அணியுடன் ரெய்னா இணைகிறார். இவர் காசியாபாத்தில் இருந்து நேரடியாக மும்பை சென்று சி.எஸ்.கே., அணியுடன் கைகோர்த்து பயிற்சியில் ஈடுபட உள்ளார்.