சி.எஸ்.கே.வின் பயிற்சி இடம் மாற்றம்; காரணம் தெரியுமா

சென்னை, மார்ச் 24-

ஐ.பி.எல். கிரிக்கெட் போட்டி அடுத்த மாதம் (ஏப்ரல்) 6-ந் தேதி தொடங்கும் நிலையில் சென்னை சூப்பர் கிங்ஸ் அணியின் பயிற்சி இடம் மாற்றம் செய்யப்பட்டுள்ளது. இதற்கான காரணமும் தெரியவந்துள்ளது.

பயிற்சியில் சி.எஸ்.கே.

2021ம் ஆண்டுக்கான ஐ.பி.எல். கிரிக்கெட் போட்டி அடுத்த மாதம் (ஏப்ரல்) 6-ந் தேதி தொடங்கி, மே மாதம் 30-ந் தேதி வரை நடக்கிறது. இதனால் ஐ.பி.எல். அணி வீரர்கள் பயிற்சியை தொடங்கி உள்ளனர்.

‛தல’ டோனி தலைமையிலான சென்னை சூப்பர் கிங்ஸ் (சி.எஸ்.கே.,) அணி வீரர்கள் கடந்த 10ம் தேதி சென்னையில் பயிற்சியை தொடங்கினர். டோனி உள்பட முன்னணி வீரர்கள் பயிற்சியில் ஈடுபட்டு வந்தனர்.

மும்பைக்கு மாற்றம்

இந்நிலையில் சென்னை அணியின் பயிற்சி இடம் மாற்றம் செய்யப்பட்டுள்ளது.

இதுபற்றி அந்த அணியின் சி.இ.ஓ. விஸ்வநாதன் கூறுகையில், ‛‛சென்னை அணி பயிற்சி மேற்கொள்ளும் இடத்தை மாற்றம் செய்துள்ளோம். மார்ச் 26ந் தேதி முதல் சென்னை அணியினர் மும்பையில் பயிற்சி மேற்கொள்ள உள்ளனர்’’ என்றார்.

காரணம் என்ன

கொரோனா பரவல் காரணமாக இந்த ஆண்டு ஒவ்வொரு அணிக்கும் சொந்த மைதானம் கிடையாது. சென்னை அணி மும்பையில் 5 போட்டிகளில் விளையாட உள்ளது. இதை கவனத்தில் கொண்டே சென்னை அணியின் பயிற்சி இடம் மாற்றம் செய்யப்பட்டுள்ளது குறிப்பிடத்தக்கது.