டோனிக்கு மாற்றாக ஜெகதீசனா; சென்னை அணி பகிர்ந்தது என்ன

ஜெகதீசன், டோனி

மும்பை, ஏப்.16-

சென்னை சூப்பர் கிங்ஸ் அணி டுவிட்டர் மற்றும் இன்ஸ்டாவில் பகிர்ந்த படத்தால் ‛தல’ டோனிக்கு மாற்று வீரராக ஜெகதீசன் உருவாக்கப்படுகிறாரா என்ற கேள்விகள் எழுந்துள்ளன.

‛தல’ டோனி

ஐ.பி.எல். தொடரில் 14வது சீசன் தற்போது நடைபெற்று வருகிறது. இதில் சென்னை சூப்பர் கிங்சை (சி.எஸ்.கே.) தவிர்த்து மற்ற 7 அணிகளுக்கும் வெவ்வேறு வீரர்கள் கேப்டனாக செயல்பட்டுள்ளனர்.

ஆனால் 2008 முதல் தற்போது வரை சென்னை அணி பங்கேற்ற 12 சீசனில் (2 சீசன் தடை) ‛தல’ டோனி மட்டுமே கேப்டனாக உள்ளார்.

டோனிக்கு சிக்கல்

இந்நிலையில் தொடர்ந்து கிரிக்கெட் ஆடாதது, வயது முதிர்வு ஆகியவற்றால் முன்புபோல் டோனியால் அதிரடியாக விளையாட முடியவில்லை. கடந்த ஐ.பி.எல். சீசனில் 14 போட்டிகளில் விளையாடிய டோனி வெறும் 200 ரன்கள் மட்டுமே எடுத்தார். அவரது சராசரி 25 தான்.

டெல்லி அணிக்கு எதிராக போல்டான டோனி

மேலும் நடப்பு தொடரில் டெல்லிக்கு எதிரான முதல் போட்டியில் களமிறங்கிய டோனி  ரன் எதுவும் எடுக்காமல் சந்தித்த 2வது பந்தில் போல்டாகி வெளியேறினார். இதனால் சென்னை அணியில் நீண்டகாலம் டோனி கேப்டனாகவோ அல்லது வீரராகவோ செயல்படுவதில் சிக்கல் ஏற்பட்டுள்ளது.

கீப்பிங் குளோசுடன் ஜெகதீசன்

இதற்கிடையே தான் சென்னை அணி நிர்வாகம் தனது டுவிட்டர் மற்றும் இன்ஸ்டா பக்கத்தில் பதிவேற்றிய படம் விவாதப்பொருளாகியுள்ளது. அந்த படத்தில் சென்னை பேட்டிங் பயிற்சியாளர் மைக்  ஹசியுடன், கீப்பிங் குளோஸ் அணிந்து ஜெகதீசன் இருக்கிறார்.

பயிற்சியாளர் ஹசியுடன், ஜெகதீசன்

இதன்மூலம் டோனிக்கு மாற்றாக ஜெகதீசனை சென்னை அணி உருவாக்குகிறதா என்ற சந்தேகத்தை ரசிகர்கள் கிளப்பி உள்ளனர். தமிழகத்தை சேர்ந்த இவரும் டோனியை போல் விக்கெட் கீப்பர் பேட்ஸ்மென் ஆவார்.

மேலும் சமீபத்தில் நடந்து முடிந்த சையது முஸ்தாக் அலி தொடரில் பங்கேற்ற ஜெகதீசன் 8 போட்டிகளில் 364 ரன்கள் குவித்தார். இவரது சராசரி 72.80 ஆகவும், ஸ்ட்ரைக் ரேட் 141.08 இருந்தது குறிப்பிடத்தக்கது.