சி.எஸ்.கே.விற்காக ரன்குவிப்பது மகிழ்ச்சியே; ‛சின்னதல’ ரெய்னா பெருமிதம்

 

மும்பை, ஏப்.11-

‛‛சென்னை சூப்பர் கிங்ஸ் அணிக்காக விளையாடி ரன்கள் குவிப்பது எப்போதும் மகிழ்ச்சியே’’ என அந்த அணியின் ‛சின்னதல’ ரெய்னா பெருமிதமாக கூறினார்.

ரெய்னா அரைசதம்

மும்பையில் நேற்று சென்னை சூப்பர் கிங்ஸ்-டெல்லி கேப்பிட்டல்ஸ் அணிகள் மோதின. முதலில் பேட் செய்த சென்னை அணி 188 ரன்கள் குவித்தது. நீண்ட நாட்களுக்கு பின் அணியில் இடம்பிடித்த ‛சின்ன தல’ சுரேஷ் ரெய்னா 36 பந்துகளில் 3 பவுண்டரி, 4 சிக்சர்களுடன் 54 ரன்கள் குவித்து எதிர்பாராத விதமாக ரன்அவுட் ஆனார்.

இந்த போட்டியில் டெல்லி அணியின் சிறப்பான பேட்டிங்கால் சென்னை அணி தோல்வியை தழுவியது. இந்நிலையில் சென்னை அணிக்காக மீண்டும் விளையாடியது குறித்து சுரேஷ் ரெய்னா மனம் திறந்து கூறியுள்ளார். அவர் கூறியதாவது:

மகிழ்ச்சியுடன் நல்ல உணர்வு

சென்னை அணிக்காக மீண்டும் களமிறங்கி ரன்கள் குவிப்பது என்பது நல்ல உணர்வாக உள்ளது. மிகவும் மகிழ்ச்சி அளிக்கிறது. நாங்கள் போட்டியை நன்றாக தொடங்கினோம். இந்த போட்டியில் நேர்மறையான எண்ணத்துடன் விளையாட விரும்பினேன். கடவுள் மிகவும் கனிவானவர். நான் நினைத்ததை செய்ய வாய்ப்பு வழங்கினார். தொடர்ந்து நன்றாக தயாராகி வருகிறேன்.

டெல்லி அணியில் மிஸ்ரா உட்பட தலைசிறந்த பவுலர்கள் இருந்தனர். இதனால் பவுண்டரி, சிக்ஸ் தவிர்த்து ஒன்று, இரண்டு ரன்கள் சேர்ப்பது முக்கியமானது. இதை மொயின் அலி நன்றாக புரிந்து கொண்டு செயல்பட்டார். எந்த அழுத்தங்களும் இன்றி நான் சாதாரணமாக ஆட அவரது புரிதல் எனக்கு உதவியாக இருந்தது. போட்டியின் இறுதியில் சாம் கரண், ஜடேஜா சிறப்பாக செயல்பட்டு அணியின் ஸ்கோரை நன்றாக உயர்த்தினர். இது நல்ல ஸ்கோர் தான்.  எங்கள் அணியில் ஸ்விங்க் செய்யும் திறமையுடன் ஷர்துல் தாகூர், தீபக் சாஹர், சாம் கரண்  உள்ளனர். வரும் போட்டிகளில் சிறப்பாக செயல்படுவார்கள்.

இவ்வாறு அவர் கூறினார்.