கோபமடைந்த கோலி பேட்டால் சேரை இடித்து தள்ளிய வீடியோ வைரல்

 

சென்னை, ஏப்.16-

ஐதராபாத்துக்கு எதிரான போட்டியில் அவுட்டான விரக்தியில் பெங்களூரு கேப்டன் விராட்கோலி பெவிலியனில் இருந்த சேரை பேட்டால் இடித்து தள்ளிய வீடியோ வைரலாகியுள்ளது. 

சேரை இடித்து தள்ளிய கோலி

ஐ.பி.எல். கிரிக்கெட் போட்டியில் நேற்று பெங்களூரு-ஐதராபாத் அணிகள் மோதின. 6 ரன்கள் வித்தியாசத்தில் ஐதராபாத் அணியை பெங்களூரு வென்றது. முன்னதாக முதலில் பேட் செய்த பெங்களூரு அணி 149 ரன்களில் சுருண்டது. மேக்ஸ்வெல் அரைசதம் கடந்த நிலையில் விராட் கோலி 29 பந்துகளில் 33 ரன்கள் அடித்தார்.

ஜேசன் ேஹால்டர் வீசிய 13வது ஓவரில் கோலி அடித்த பந்தை நீண்டதூரம் ஓடிச்சென்று விஜய்சங்கர் அற்புதமாக கேட்ச் பிடித்து அவரை அவுட்டாக்கினார். இதை சற்றும் எதிர்பாராத விராட்கோலி கோபமடைந்தார். ஆக்ரோஷமடைந்த அவர் பெவிலியன் திரும்பிய நிலையில் அங்கு இருந்த சேரை தனது பேட்டால் இடித்து தள்ளினார். இதுதொடர்பான வீடியோ சமூக வலைதளங்களில் வெளியாகி வைரலாகியுள்ளது. வீடியோ பார்க்க கீழே கிளிக் செய்யவும்.

கண்டித்த நடுவர்

ஐ.பி.எல். விதிகள் படி கோலியின் இத்தகைய செயல்பாடு லெவல்-1 பிரிவு 2.2 வகையை சேர்ந்த குற்றமாகும். இதில் போட்டி நடுவரின் தீர்ப்பே இறுதியானது. அபராதம் விதிக்க வாய்ப்புள்ளது. இருப்பினும் விராட் கோலியின் இத்தகைய செயலை நடுவர் கண்டிக்க மட்டும் செய்தார். இதனால் கோலி அபராதத்தில் இருந்து தப்பித்தார்.