‛பிக்பாஸ்’ சிநேகனுக்கு நடிகையுடன் திருமணம்; வயது வித்தியாசம் என்ன தெரியுமா

சென்னை, ஜூலை 26-

திரைப்பட பாடலாசிரியரும், பிக்பாஸ் போட்டியாளருமான கவிஞர் சிநேகனுக்கும், நடிகை கனிகாவுக்கும் ஜூலை 29ல் நடிகர் கமல் முன்னிலையில் திருமணம் நடக்க உள்ளது.

பாடலாசிரியர் சிநேகன்

தமிழ் திரைப்பட பாடலாசிரியர் சிநேகன். கவிஞரான இவர் 2000க்கும் அதிக பாடல்கள் எழுதியுள்ளார். படங்களிலும் நடித்துள்ளார். விஜய்டிவியில் ஒளிபரப்பான பிக்பாஸ் நிகழ்ச்சியில் கலந்து கொண்டு புகழ்பெற்றார்.

தற்போது நடிகர் கமலின் மக்கள் நீதிமய்யம் கட்சியில் செயற்குழு உறுப்பினராக உள்ளார். சமீபத்தில் நடந்து முடிந்த சட்டசபை தேர்தலில் மக்கள் நீதிமய்யம் சார்பில் சென்னை விருகம்பாக்கம் தொகுதியில் போட்டியிட்டு தோல்வி அடைந்தார்.

நடிகையுடன் திருமணம்

இந்நிலையில் சிநேகனுக்கும் நடிகை கனிகாவுக்கும் திருமணம் நடக்க உள்ளது. வீடியோ ஜாக்கியான(VJ) இவர் சன்டிவியில் வெளியான ‛கல்யாண வீடு’ சீரியலில் லீட் ரோலில் நடித்தார்.

அதன்பின் அடுத்த சாட்டை, தேவராட்டம் படங்களிலும் நடித்தார். இவர் நடித்த ராஜவம்சம் படம் இன்னும் வெளியாகவில்லை. 

கமல் தலைமையில்...

இவர்களின் திருமணம் கமல் தலைமையில் ஜூலை 29ல் நடக்கிறது. இதுதொடர்பாக சிநேகன் வெளியிட்டுள்ள அறிக்கையில் கூறப்பட்டுள்ளதாவது:

‛‛ஜூலை 29ல் எனக்கும், கனிகாவுக்கும் உலக நாயகன் கமல் முன்னிலையில் சென்னையில் திருமணம் நடக்க உள்ளது. என்மீது அன்பு செலுத்தி ஆசீர்வாதம் செய்யும் உங்கள் அனைவரின் முன்னிலையில் தான் திருமணம் செய்து கொள்ள விரும்பினேன். ஆனால் காலம் அதற்கு இடம்கொடுக்கவில்லையே என வருந்துகிறேன். இன்றைய சூழலில் மனிதர்கள் கூடி மகிழ்வது அனைவருக்கும் பேராபத்தாக இருப்பதால் அனைவரின் நலன்கருதி எளிமையாக திருமணம் செய்து கொள்கிறோம். அரசு வழிக்காட்டல் படி முறையான பாதுகாப்பு நடவடிக்கைகளுடன் திருமணம் நடக்க உள்ளது’’ எனக்கூறி இருக்கிறார்.

வயது வித்தியாசம்

பாடலாசிரியர் சிநேகனுக்கு தற்போது 43 வயதாகும். நடிகை கனிகாவின் வயது 29. இருவருக்கும் 14 வயது வித்தியாசம் என்பது குறிப்பிடத்தக்கது.

இதற்கிடையே திருமணத்துக்கு முன்பு சிநேகன், கனிகா ஆகியோர் சேர்ந்து எடுத்து கொண்ட போட்டோக்கள் இணையத்தில் வைரலாகி உள்ளன.