விஜயின் ‘வாத்தி கம்மிங்’ பாடலுக்கு வார்னர் அசத்தல் நடனம்; வைரலாகும் வீடியோ

வீடியோ காட்சி கீழே பதிவிடப்பட்டுள்ளது.

சிட்னி, ஆக. 2–

மாஸ்டர் படத்தில் விஜய் ஆடிய ‘வாத்தி கம்மிங்...’  பாடலுக்கு ஆஸ்திரேலிய கிரிக்கெட் ஜாம்பவான் டேவிட் வார்னர் நடனம் ஆடி அசத்தியுள்ளார். இந்த வீடியோ தற்போது வைரல் ஆகி வருகிறது.

மெகா ஹிட் பாடல்

விஜயின் மாஸ்டர் படத்தில் இடம்பெற்றுள்ள ‘வாத்தி கம்மிங்...’ பாடல் மெகா ஹிட் ஆனது. இப்பாடலுக்கு அனிருத் இசை அமைத்தார். யூடியூப்பில் இதுவரை 234 மில்லியன் பேர் பார்த்து ரசித்துள்ளனர்.

இந்திய கிரிக்கெட் வீரர், வீராங்கனைகள், இந்திய திரை நட்சத்திரங்கள், ரசிகர்கள் என பல தரப்பினரும் இப்பாடலுக்கு விஜயை போன்று நடனம் ஆடி சமூக வலைத்தளங்களில் பதிவிட்டு லைக்களை அள்ளினர்.

வார்னர் அசத்தல் நடனம்

தற்போது அந்த வரிசையில் ஆஸ்திரேலிய கிரிக்கெட் ஜாம்பவான் டேவிட் வார்னரும் இடம்பெற்றுள்ளார். தனது வீட்டு டிவியில் ‘வாத்தி கம்மிங்...’ பாடலை ஓடவிட்டு, அதன் முன் நின்று அசத்தல் டான்ஸ் போட்டுள்ளார். இக்காட்சியை அப்படியே வீடியோவாக பதிவு செய்து தனது ‘இன்ஸ்டா’ பக்கத்தில் இன்று பதிவிட்டார்.

வீடியோ காட்சியில் விஜய் ஆடுவதை போல தானும் அசைவுகளை மேற்கொள்ள முயற்சித்துள்ளார். அவர் ஆடும் போது பிள்ளைகள் செய்த சேட்டைகளும் காட்சியில் இடம் பிடித்துள்ளன. இதுவும் ரசிக்கும்படியாக உள்ளது.

16.5 லட்சம் பார்வை

டேவிட் வார்னருக்கு இந்தியாவையும், இந்தியர்களை மிகவும் பிடிக்கும். அதிலும் தமிழர்கள் மீது அவருக்கு அளவு கடந்த பிரியம் உண்டு. இதனால், ஏற்கனவே இந்திய திரை நட்சத்திரங்கள் தோன்றிய காட்சிகளில் மார்பிங் செய்த தனது முகத்தை இணைத்து சமூக வலைத்தளத்தில் பதிவிடுவதை வாடிக்கையாக கொண்டுள்ளார்.

இப்படி சூப்பர் ஸ்டார் ரஜினி, விஜய், தனுாஷ், சூர்யா, கிருத்திக்ரோஷன், அல்லுஅர்ஜூன் உள்ளிட்ட பல பிரபலங்களை போல ‘உருமாறி’ இருக்கிறார். இதன் தொடர்ச்சியாக தான் வாத்தி கம்மிங் பாடலுக்கு நேரடியாகவே ஒரு ஆட்டத்தையும் போட்டு அசத்தியுள்ளார்.

இந்த வீடியோ அவர் பதிவிட்ட 7 மணி நேரத்தில் 16.5 லட்சம் பார்வைகளை கடந்தது.

–––––

இதோ வீடியோ: வார்னரின் அசத்தல் வீடியோ காட்சி