வாகா எல்லையில் ‛தல’ அஜித்; வைரலாகும் படத்தின் பின்னணி தெரியுமா
புதுடெல்லி, ஆக.19-
வாகா எல்லையில் எல்லை பாதுகாப்பு படை(பி.எஸ்.எப்.,) வீரர், வீராங்கனைகளுடன் ‛தல’ அஜித் இருக்கும் படங்கள் இணையதளத்தில் வைரலாகி உள்ளன. இதை அஜித் ரசிகர்கள் டிரெண்டிங் செய்து வருகின்றனர். இதன் பின்னணி குறித்த தகவல்கள் வெளியாகியுள்ளன.
அஜித்தின் வலிமை
தமிழ் திரையுலகில் முன்னணி நடிகர்களில் ஒருவர் ‛தல’ அஜித். இவர் எச்.வினோத் இயக்கத்தில் வலிமை படத்தில் நடித்துள்ளார். படப்பிடிப்பு முழுவதுமாக முடிந்துவிட்டது. இதற்கு யுவன்சங்கர்ராஜா இசை அமைத்துள்ளார். போனி கபூர் தயாரித்துள்ளார்.
வலிமை அப்டேட் கேட்டு ரசிகர்கள் அடம் பிடித்தனர். வெளிநாட்டு கிரிக்கெட் வீரர்கள், பிரபலங்கள் முதல் உள்ளூர் ஜி.பி.முத்து வரை யாரையும் ரசிகர்கள் விட்டு வைக்கவில்லை. அப்டேட் கேட்டு அன்பு தொல்லை கொடுத்தனர். தற்போது வலிமை பட அப்டேட்கள் தொடர்ந்து வெளியாகி வருகின்றன. படமும் பொங்கலுக்கு வெளியாக உள்ளது. இதனால் ரசிகர்கள் மட்டற்ற மகிழ்ச்சியில் உள்ளனர்.
வாகா எல்லையில் அஜித்
இந்நிலையில் தான் அஜித் பஞ்சாப் மாநிலத்தில் உள்ள வாகா எல்லையில் எல்லை பாதுகாப்பு படை வீரர், வீராங்கனைகளுடன் இருக்கும் படங்கள் இணையதளத்தில் வைரலாகி உள்ளன. இதன் பின்னணி விபரங்கள் வெளியாகியுள்ளன.
அதாவது ரஷ்யாவில் வலிமை படத்தின் இறுதிக்கட்ட படப்பிடிப்பை முடித்த அஜித் நாடு திரும்பினார். அதன்பிறகு அவர் வடஇந்தியாவில் சுற்றுப்பயணம் செய்து வருகிறார். சமீபத்தில் அவர் தாஜ்மகால் முன் எடுத்த படம் வெளியாகி இணையத்தை கலக்கியது.
இதன் தொடர்ச்சியாக பல்வேறு இடங்களுக்கு சென்ற அஜித் இந்தியா-பாகிஸ்தான் எல்லையான வாகாவுக்கும் சென்றார். அங்கு அஜித்தை அடையாளம் கண்ட வீரர், வீராங்கனைகள் அவருடன் படங்கள் எடுத்து கொண்டனர். இந்த புகைப்படங்கள் தான் தற்போது அஜித் ரசிகர்கள் டிரெண்டிங் செய்து வருகின்றனர் என்பது குறிப்பிடத்தக்கது.
No comments